ناس كتير بتحب تاكل أو تقزقز حاجة بالليل لكن بيخافوا من مشاكل الهضم أو التخن وتراكم الدهون.عشان كده جمعنالكم الأكل اللي ممكن ناكله بالليل من غير ما نخاف من المشاكل دي!
1# التفاح
التفاح فيه ألياف وفيتامينات ومياه وعناصر غذائية مختلفة وكمان مسكر للناس اللي بتحب السكريات بالليل. نقدر ناكل تفاح مع زبدة الفول السوداني كوجبة مغذية ومشبعة ومش هتضرنا لو كلناها بالليل!
2# الجبنة القريش
الجبنة القريش تعتبر من أخف منتجات الألبان وأكترها فايدة لإن مفيهاش دهون ونسبة الأملاح فيها قليلة جدا. في نفس الوقت الجبنة القريش مليانة بروتين وكالسيوم ووجبة مناسبة جدا بالليل مع خيار أو حتى مع فاكهة زي المشمش!
3# الكريز
الكريز فاكهة ممتازة للقزقزة للناس اللي بتحب السكريات. وبما إن سكرياته طبيعية وصحية فالكريز مناسب جدا للأكل بالليل، زائد إنه صحي وليه خصائص مضادة للالتهابات، وفي دراسات بتقول إن أكله بالليل ممكن يساعد على النوم أحسن!
4# الفسدق
الفسدق أكتر نوع مكسرات مناسب للأكل بالليل لإن بالإضافة لكل العناصر الغذائية المهمة اللي فيه، الفسدق بيتميز بنسبة عالية من الميلاتونين اللي بيساعد على النوم بشكل كويس. هيغذي الجسم ويساعدنا على التخلص من الأرق!
5# الكورن فليكس
الكورن فليكس مش بس للفطار، هيكون وجبة ممتازة جدا بالليل خصوصا لما يتعمل بلبن سخن. وجبة مشبعة ودافية هتحسس الأعصاب بالهدوء وترفع نسبة الميلاتونين وبالتالي تساعدنا ننام أحسن. نقدر نستبدل حبوب الكورن فليكس بالشوفان ونخلي الوجبة صحية أكتر!
6# الزبادي
الزبادي مصدر مهم جدا للكالسيوم والبروتين، زائد إن البكتيريا النشطة اللي فيه بتساعد على تحسين الهضم وتقليل مشاكل المعدة. في دراسات بتقول إنه بيساعد على إفراز الميلاتونين في الجسم وبالتالي بيساعد على النوم!
7# بذور القرع (اللب الأبيض)
اللب الأبيض غني بالمغنيسوم والتربتوفان اللي بيحفز إفراز الميلاتونين في الجسم. قزقزة مغذية وحلوة بالليل وهيساعدنا على النوم لكن لازم نختار اللب اللي من غير ملح عشان ما يبقاش ضار لصحتنا!
8# البيض
وجبة خفيفة وسريعة ومليانة بروتين. زائد إن البيض ممكن يتعمل بأكتر من طريقة زي إنه يتسلق ويتاكل لوحده أو في سلطة بيض أو يتقلي وغيرها من الطرق. شوفوا كمان بالفيديو سلطة بيض بالكاري صحية ولذيذة جدا!
9# الجزر
الجزر غني بالفيتامينات والألياف الطبيعية اللي بتخلينا نحس بالشبع ومانحتاجش ناكل حاجات كتير، أكل الجزر بالليل آمن جدا على الهضم وأحسن بكتير من أي تسالي صناعية فيها مواد حافظة!
شوفوا كمان 10 طرق ممتازة لتقليل الشهية والأكل الكتير
10# عيش الحبوب الكاملة
العيش المعمول من الحبوب الكاملة أحسن في الهضم وأفيد للجسم وبيشبع أكتر، والأهم إننا ينفع ناكله بالليل من غير قلق على الهضم أو السمنة زي لو هناكل عيش أبيض!