من أهم مميزات الخلاط اليدوي هو إننا نقدر نستخدمه جوه الحلة أو الحاجة اللي اللي بنعمل فيها الأكل مباشرة، وعشان بنحركه بإيدينا وشايفين الأكل وإحنا بنخلط بيدينا درجة تحكم أكتر ويوفرلنا وقت. شوفوا معانا عشر أفكار تورينا الطرق المختلفة اللي نستفيد بيها من الخلاط اليدوي:
1. صلصة كتيير
صلصة الطماطم من أكتر الحاجات اللي بنستخدمها في طبخات كتير كذا مرة في الإسبوع، ومعظمنا بيحبها معمولة من طماطم فريش. الخلاط اليدوي هيساعدنا نعمل كمية كبيرة من صلصة الطماطم ونخزنها في الفريزر فترات طويلة في وقت أقل من المعتاد. هنحتاج بس نقطع الطماطم أرباع، نحطها في حلة مع مياه قليلة ونسيبها تستوي وبعدين نضربها بالخلاط اليدوي وهي جوة الحلة لحد ما تبقى ناعمة خالص، أول ما تبرد نعلب ونخزن!
2. عجينة الكريب والبان كيك
عشاق الكريب هيقدروا سرعة إننا نعمله من غير وقت ولا مجهود وناكله بإستمرار بسبب الخلاط اليدوي. كل المقادير هتتحط في الشفشق اللي بييجي مع الخلاط ، نضربهم في ثواني من غير ما نلاقي أي كتل، ونعملهم في دقايق!
3. شوربة مهروسة
مين مابيحبش الشورب الكريمي زي شوربة الماشروم، والطماطم، والبسلة؟ الخلاط اليدوي بيخلي الشورب البيوريه بالذات من أسهل ما يمكن! مش هنحتاج ننقل الخضار من الحلة للخلاط ولا نقطع الخضار حتت صغيرة خالص، هو بس يستوي كويس والخلاط اليدوي يطلعلنا شوربة ناعمة جداً ممكن مانحتاجلهاش كريمة من كتر ما هي كريمي لوحدها!
4. مايونيز بيتي
من أشهر الحاجات اللي بتتعمل بالخلاط اليدوي هو المايونيز لإن مقاديره بسيطة جداً – بيض وزيت وخل – وبيتعمل في ثواني بالخلاط اليدوي بقوام كريمي جميل وأطعم من الجاهز بكتير. لو جربتوه مش هتشتروه من برة تاني!
5. سموزي منعش
نشجع نفسنا ناكل فاكهة أكتر بإننا نعملها سموزي سريع ومنعش بسرعة (كمان للفاكهة اللي استوت قوي عندنا). هنقطع الفاكهة ونحطها مع العصير أو اللبن في شفشق و نضربهم بالخلاط اليدوي لحد ما يبقى سموزي صحي ولذيذ.
6. كريم شانتيه وفروستينج
من الحاجات اللي ناس كتير ماتعرفهاش هي إن الخلاط اليدوي ممتاز في خفق الكريمة والفروستنج. نحط الكريمة مع السكر ونخلط بالخلاط اليدوي بحركة أفقية (فوق وتحت) وفي ثواني يبقى عندنا كريم شانتيه – أسرع بكتير!
7. مافنز صحية
ميزة عظيمة بالذات مع الأطفال لما نعوز نأكلهم خضار وفواكه أكتر بما إن معظمهم بيعشقوا المافنز. هنزود لمقادير عجينة المافن خضار لو حادق أو فاكهة لو حلو ونخلط كله بالخلاط اليدوي لحد ما مايبانش من الخضار أو الفاكهة أي حاجة. طعمها هيبقى جميل ومحدش هيعرف!
8. صوص جبنة ناعم
عايزين نعمل صوص جبنة ناعم زي المطاعم لكن دايماً بيفضل حتت جبنة ماساحتش أو مكلكعة؟ الخلاط اليدوي هو أبسط وأسرع حل. ونقدر نعمل نفس الحاجة مع البشاميل لما نلاقي أي دقيق مكلكع (أكتر حاجة بتحصل مع البشاميل!)
9. زبدة تفاح
سمعنا عن زبدة اللوز وزبدة الفول سوداني كتير لكن حد جرب زبدة التفاح؟ فكرة جديدة ولذيذة جداً، هنسوي التفاح كويس ونزودله عسل وقرفة ولمون وبعدين نهرسه بالخلاط اليدوي. نعمله سبريد على توست ومش هتصدقوا الطعم!
10. صوص البستو
البستو من ألذ الصوصات الإيطالية وكل ما كان قوامه أنعم كل ما كان ألذ. كل اللي هيحتاجه ريحان، ثوم، زيت زتون، وصنوبر أو عين جمل ويتخلط بالخلاط اليدوي عشان يدينا أكتر قوام كريمي. نحطه على المكرونة، وبقى عندنا أسهل وأحلى باستا بالبستو من غير ما نروح المطعم!
موديلات وأسعار خلاط مولينكس اليدوي
| MASTERBLEND - 1000W, double whisk, chopper 1,5L, Food Pro, Champagne | 1,599 ج.م |
| MASTERBLEND - 1000W, double whisk, chopper 1,5L, Food Pro, Red | 1,599 ج.م |
معلومة هامة : هذه الأسعار قابلة للتغيير فى حالة العروض
لمزيد من المعلومات زوروا :
https://www.moulinex.com.eg
https://www.facebook.com/MoulinexEgypt