in

10 طرق ممتازة لتقليل الشهية والأكل الكتير!

لتقليل الشهية

الشهية المفتوحة طول الوقت مش دايما حاجة كويسة، لإن الأكل أكتر من اللازم غلط على صحتنا وبيعرضنا للوزن الزايد ومشاكل الهضم وغيرها، عشان كده جبنالكم الطرق العلمية اللي ممكن نتحكم فيها بالشهية المفتوحة عشان ما نبقاش طول الوقت بناكل!

1# أكل بروتين أكتر

كل ما كان البروتين في الأكل أكتر كل ما هنحس بالشبع أكتر ولمدة أطول لإن البروتين بيدي إحساس بالشبع. زائد إنه هيخلينا ناكل كمية أقل في الوجبة اللي بعدها.

2# الأكل الغني بالألياف

الأكلات الغنية بالألياف زي الشوفان والحبوب الكاملة والخضار بتساعد على الشعور بالشبع لفترة أطول وبتدي إحساس بالامتلاء وده بيقلل القزقزة أو الأكل بسبب الملل. غير إن الألياف مفيدة للجسم ولصحة الجهاز الهضمي كمان.

3# شرب القهوة

القهوة من أكتر المشروبات اللي بتقلل الشهية وتحسس بالشبع لإنها بتحفز إفراز الببتيد، هرمون بتفرزه المعدة لما بناكل عشان نحس بالشبع. بالتالي القهوة ممكن تحسسنا بالشبع لمدة 3 ساعات، حتى لو منزوعة الكافيين.

4# شرب المياه

بالإضافة للفوايد الكتيرة جدا لشرب المياه باستمرار، المياه بتساعد على تقليل الشعور بالجوع وبتقلل الكمية اللي محتاجين ناكلها. شرب المياه على مدار اليوم هيقلل من القزقزة الزيادة وهيخلينا ناكل الكمية اللي محتاجينها بس.

5# الأكل في أطباق أصغر

الأطباق الكبيرة بتخلينا ناكل كميات أكل أكتر من اللي محتاجينها والتعود عليها، لما ناكل في أطباق أصغر هناكل كمية معقولة من غير ما نحس إننا بناكل أقل أو بنحرم نفسنا.

6# الفلفل

الفلفل الحراق والفلفل الحلو فيهم مواد بتعزز الشعور بالشبع وتقليل الجوع لفترة من الوقت، الفترة دي مختلفة من شخص للتاني. لكن في العموم الاكل الحراق أو اللي فيه فلفل بيساعد على الشعور بالشبع أسرع وتأخير الإحساس بالجوع.

7# الشوكولاتة الدارك

ميزة الشوكولاتة الدارك إنها مش مسكرة وبالتالي مابتخليش الجسم يطلب سكريات أكتر. أكل الشوكولاتة الدارك بيساعد في تقليل الشهية للأكل والحلويات لإن الكاكاو بيحفز هرمونات الشبع وبيقلل الاحتياج للسكريات.
شوفوا كمان أحسن 11 أكلة لفطار يسندك طول النهار!

8# أكل الحاجة بدل شربها

عملية المضغ بتحفز الشعور بالشبع أكتر وبالتالي الأكل الصلب بيساعد على تقليل الجوع أكتر من السوايل. الأحسن إننا ناكل الفاكهة مثلا بدل ما نشرب العصير، الفايدة هتكون أكبر وهنقلل الشعور بالجوع.

9# التركيز في الأكل

الأكل بسرعة أو مع الكلام أو الفرجة على حاجة من أكتر الحاجات اللي بتخلينا ناكل أ:تر من اللازم. مفروض نركز في الأكل أكتر وناكل ببطء ونمضغ الأكل كويس عشان نشبع بالكمية اللي محتاجينها بس.

10# النوم وقت كفاية

الجسم محتاج على الأقل 7 ساعات من النوم عشان يرتاح ويبدأ يومه بنشاط وصحة كويسة، النوم لوقت أقل من كده بيسبب خلل في وظائف الجسم ومن ضمنها الشعور بالجوع أكتر وفي فترات أقل وبيرفع معدل التوتر اللي بيسبب زيادة الشهية كمان.