في غلطات بنعملها في المطبخ تبان إنها بسيطة لكن تأثيرها بيبقى كبير. لو صلحناها حياتنا في المطبخ هتبى أسهل وأأمن بكتير!
1. بنحط حاجات سخنة في الخلاط
بخار الحاجة السخنة اللي بنحطها في الخلاط بيعمل ضغط أعلى جواه وممكن يطير الغطا وتنفجر الحاجة السخنة علينا وتسبب لنا حروق شديدة. لازم نخلي الحاجة تبرد شوية قبل ما نحطها
2. بنملى حلة الضغط لآخرها
حلة الضغط ما ينفعش تتملي بمكونات لأكتر من تلتين الحلة، لازم يبقى فيه تلت فاضي عشان البخار يكون فيه والضغط يعلى ويسوي الأكل. لو إستخدمنا مياه كتير كمان الأكل مش هيبقى ليه طعم وممكن ما يستويش مظبوط. لكن بردو نخلي بالنا إن لازم يكون فيه مياه كفاية، في حلة ضغط تيفال كليبسو لازم يكون فيه على الأقل 250 مل سوايل.
3. ما بننضفش التلاجة بإستمرار
المفروض ان التلاجة تتنضف أسبوعياً، لكن لو ده هيكون تقيل علينا ممكن ننضفها تنضيف كامل مرة في الشهر، وطبعا لو أي حاجة اتدلقت لازم نمسحها في ساعتها عشان نمنع إنتشار البكتيريا لبقية الأكل ونتجنب الامراض.
4. بنستخدم زيت كتير مع تيفال
حلل وطاسات تيفال فيها طبقة ضد الإلتصاق من أهم مميزاتها إنها مابتحتاجش نحط مادة دهنية إلا بكمية بسيطة جداً من غير ما نقلق على الأكل إنه يلزق أو يتحرق أو ما يستويش مظبوط. أما في قلاية تيفال الصحية أكتيفراي الفكرة الأساسية فيها إننا نتفادى الطبخ بالزيت، أقصى كمية نستخدمنها فيها هي معلقة أكتيفراي الخضرا – معلقة واحدة بس إذا احتاجنا!
5. بنسيح اللحوم على رخامة المطبخ
أكتر حاجة غلط هي اننا نسيب اللحمة على الرخامة تلم بكتيريا وجراثيم, أسلم طرق نسيح بيها اللحمة هي اننا نحطها في التلاجة قبل ما نطبخها بيوم أو في مياه ساقعة أو في المايكروويف على درجة حرارة قليلة.
6. مابنستخدمش زرار النبض
ناس كتير ما تعرفش إن محضر الطعام مش بس بيستخدم في إننا نهرس المكونات، محضر الطعام وظايفه أكتر من كدة بكتير زي التقطيع والبشر والعجن والعصر. لما نيجي عند وظيفة الفرم وعايزين نفرم حاجات فرم خشن زي الخضار أو المكسرات لازم نستخدم زرار النبض ومانشغلوش أكتر من ثانية ونوقف، ثانية تانية ونوقف وإلا المكونات هتتهرس فوراً كل مرة!
7. بنرص الخلاط غلط
السبب في إن الخلاط بيقف كل شوية ونحاول نرجه ونقلب المكونات فيه هو إن ترتيب المكونات غلط. لازم نحط السوايل الأول وبعدها المكونات الطرية وآخر حاجة المكونات الجامدة زي التلج مثلاً – بعيد عن شفرات الخلاط، وبكدة هنحافظ على الخلاط وهيشتغل أسرع بكتير.
8. بنفتح الفرن على الأكل كل شوية
كل مرة بنفتح فيها الفرن عشان نبص على الأكل بندخّل الهوا الساقع في الفرن وده بيأثر على سرعة سوى الأكل وممكن يسبب انه ما يتظبطش زي الكيكة اللي بتهبط لو فتحنا عليها الفرن بدري، المفروض نسيب الأكل للمدة المطلوبة في الوصفة ومانفتحش الفرن إلا بعد المدة دي.
9. ما بنستناش الطاسة تسخن
لازم مع أي حاجة هنطبخها نستنى لما الطاسة توصل درجة الحرارة المناسبة عشان الأكل يستوي مظبوط. من أحلى الميزات في طاسات تيفال هي تقنية ثرموسبوت – العلامة الحمرا اللي في نص الطاسة اللى بتقولنا لما الطاسة تكون سخنت وجاهزة للطبخ.
10. بندخل الأكل التلاجة وهو لسة سخن
لما نحط أكل لسة سخن جوة التلاجة على طول هيغير حرارة التلاجة ودة ممكن يبوظ محتويات التلاجة ويخللي البكتيريا تنمو في الأكل اللي حطيناه بشكل أسرع. لازم نسيبه برة يبرد شوية وما فيش قلق إنه يبوظ في الفترة البسيطة دي.