غسالة الأطباق أهم مميزاتها بالمقارنة بغسيل المواعين اليدوي هي إنها بتستخدم مياه أقل بكتير، بتستهلك مجهود وطاقة أقل أكتر، ووقت لا يذكر! أسباب مهمة تخلينا نختارها بدون تردد ونعرف إزاي نستخدمها بأحسن شكل عشان نستمتع بالمميزات دي بأكبر صورة.
1. نمسح بقايا الأكل
بقايا وحتت الأكل الكبيرة في الأطباق ممكن تسد فلتر الغسالة فا لازم نمسحهم قبل ما نحطهم جوة الغسالة. وعشان نسهل الخطوة دي على نفسنا نمسحهم أول بأول، لو سبناهم فترة البقايا هتنشف وتبقى أصعب بكتير.
2. الرف التحتاني للحاجات الكبيرة
الأطباق الكبيرة، الحلل، الصواني، البولات الكبيرة، وحتى المجات والكوبايات الكبيرة بتترص في الرف التحتاني بميل بحيث يكون وشهم لتحت عشان المياه متتجمعش عليهم وتتزحلق منهم بسهولة. أهم حاجة مانزحمش الرف ونتأكد إن دراعات الرش بتلف براحتها من غير ما حاجة تعاكسها.
3. الرف اللي فوق للكوبايات والمواعين الصغيرة
الأطباق والحلل الصغيرة بيترصوا في النص وشهم لتحت ومعالق الطبخ الكبيرة تتحط بشكل أفقي جمبهم. الكوبايات دايماً تترص على الحواف بميل لتحت عشان المياه ماتتجمعش جواهم، وطبعاً ما نزحمش الرف عشان المواعين تتغسل كويس.
4. المعالق والشوك في الباسكت
في أي غسالة أطباق بيبقى فيه باسكت مخصوصة للمعالق والشوك عشان مايقعوش جوة الغسالة. نرص المعالق والشوك بالدراعات لتحت والسكاكان دايماً تبقى دراعها لفوق للأمان.
5. نحط الصابون في المكان الصح
في كذا نوع صابون بيوفرهملنا فينيش على حسب إحتياجانا – الباودر والأقراص. أياً كان النوع اللي هنستخدمه لازم نتأكد إننا بنحطه في الجزء المخصص ليه اللي بيبقى موضح في كتيب كل غسالة أطباق، وفي حالة الباودر نتأكد إننا بنستخدم الكمية المناسبة بس مش أقل ولا أكتر.
6. زيت الشطف والملح
الملح أهميته إنه بينعم مياه الغسيل ودة بيخلي الصابون ينضف بكفاءة أعلى والمواعين ماتبهتش مع الوقت، ليه مكانه الخاص (جمب الفلتر) اللي نحطه فيه مع مياه لمستوى محدد ونقفل عليه كويس. زيت الشطف أهميتة في إسمه – بيضمن إن المواعين تتشطف تماماً ومايفضلش أى نقط مياه أو رواسب صابون عليها وتنشف بشكل أحسن وتحافظ على لمعانها – ليه مكانه الخاص عادة جمب جزء الصابون. الإتنين لازم نملاهم كل فترة، معظم الغسالات بيبقى فيها مؤشر يقولنا إمتى محتاجين ملح أو زيت، لو مافيهاش يبقى نتأكد من مستواهم مرتين في الشهر.
7. نختار البرنامج المناسب
بنختار البرنامج (مدة الغسل والتجفيف والحرارة) على حسب كمية المواعين وهي مش نضيفة بدرجة قد إيه وفي كل حالة لازم نرجع لكتيب تعليمات الاستخدام عشان نختار أكتر برنامج مناسب يغسلنا المواعين مظبوط وفي نفس الوقت مايهدرلناش مياه وطاقة على الفاضي.