حاجات ما تخطرش على بالنا بتأثر بشكل كبير في إستطعام لساننا للأكل!
1. لون العبوة
من أوائل البراندات اللي إكتشفت المعلومة دي كانت سفن أب في سنة 1930 لما زودوا اللون الأصفر في التغليف بنسبة 15% الناس حست إن السفن أب بقى طعمه فيه لمون أكتر بالرغم إنه هو هو نفس المشروب مزودوش عليه حاجة!
2. نوع أداة الأكل
نوع الأداة سواء شوكة أو معلقة أوأعواد الأكل الآسيوية، خامة الأداة معدن أو بلاستيك أو خشب، وزن الأداة، كلها حاجات بتخلي طعم نفس الأكلة يبقى مختلف. مثلاً الفضيات بتأثر على حليمات اللسان وتدي الأكلة طعم معدني قوي على عكس الخامات التانية.
3. درجة حرارة الأكل
على سبيل المثال اللحوم بيبقى طعمها مملح أكتر لما تتاكل ساقعة! دة بسبب إن حليمات اللسان فيها قنوات بتترجم الطعم بشكل مختلف تحت درجات حرارة متفواتة.
4. السعر المتوقع
في دراسات إكتشفت إن شكل الأكل أو العبوة اللي محطوط فيها لما بيبقى أشيك أو أغلى الناس بتحس إن طعمه أحلى بشكل ملحوظ، أو حتى لما يشوفوا سعر أعلى بالرغم إنها نفس الأكلة بالظبط!
5. نوع المزيكة
في المطاعم بالذات هنلاقي إن دايماً في مزيكة شغالة وإحنا بناكل. لو المزيكة فيها أصوات رفيعة وعالية كتير في نفس مستوى الرنة هنلاحظ إن دة بيخلي الحاجة مسكرة أكتر بنسبة 10%، معلومة تخلينا نشغل المزيكة دي وقت الحلو!
6. لون الأكل
إتضح إن لو غيرنا لون الأكل بألوان صناعية ممكن نضحك على لساننا! في تجربة قدموا لناس مشروب بطعم الليمون وحطينله لون برتقالي، معظم الناس قالت إن طعمه عصير برتقال!
7. وصف الأكل في المنيو
لما نشوف في المنيو طبق وتحته وصف فاتح للشهية دة بيخلينا نستطعم الطبق أكتر بنسبة 28% عن لما نقرى إسم الطبق بس. عشان كدة المطاعم اللي بتبقى كاتبة وصف مغري لكل طبق في المنيو مبيعاتها أكتر بكتير.
8. لون الطبق
على حسب لون الأكلة لون الطبق ممكن يحسسنا بطعم مختلف لنفس الأكل ودة بسبب نسبة التباين ما بين اللونين، في أطباق ممكن لونها ينطق الأكلة أكتر للعين فاللسان يترجمها بنفس الطريقة.
9. السن
كل ما بنكبر في السن كل ما الخلايا اللي في منطقة المناخير مبتتجددش بنفس السرعة ودة بيأثر على حاسة الشم اللي بالتالي بتأثر على حاسة التذوق.